Un total de 285 persoas son as que están a participar da segunda etapa de cursos incluídos no programa ‘Tempo de lecer’, organizado pola concellería de Participación Cidadá que dirixe a edil Julia Loureiro.

 Estes cursos iniciáronse o pasado mes de setembro e rematarán en decembro. Será entón cando se realice un acto de clausura consistente na exposición de tódolos traballos realizados polos alumnos durante as dúas quendas de ‘Tempo de lecer’: de xaneiro a xuño de 2009 e de setembro a decembro deste mesmo ano.

 A concelleira responsable desta iniciativa, Julia Loureiro, fixo hoxe unha valoración sobre a mesma declarando que “é unha boa maneira de animarse a saír da casa coa chegada do mal tempo e, con tal motivo, relacionarse con outros veciños e veciñas aprendendo cousas novas”.  Segundo Loureiro, a meirande parte dos usuarios dos cursiños de ‘Tempo de lecer’ son mulleres de mediana idade, “aínda que dende a concellería de Participación Cidadá animamos a tódolos mosenses a participar, xa que hai clases moi interesantes tanto para a mocidade como para os homes”.

 En total, a día de hoxe, estanse a impartir 21 cursos repartidos entre 16 asociacións do Concello de Mos. O Grupo de Baile Nosa Terra de Pereiras ensina baile tradicional a 15 persoas. No Círculo Cultural e Deportivo As Pedriñas reciben clases de pintura en tea 10 persoas, e de bailes latinos 18 persoas. Na Asociación de Veciños Nosa Terra de Pereiras dáselle un curso de Pilates a 14 alumnos. A Asociación Cultural A Cividade conta cun curso de cociña e repostería para 14 veciños. Nas clases de Ioga impartidas na Asociación de Veciños Santa Mariña de Dornelas participan un total de 14 persoas. Asomamos, Asociación de Maiores Pensionistas Xubilados, conta cun curso de autoestima e habilidades sociais que ten 10 participantes, e outro de pandeireta con outros 10 alumnos. No Círculo Cultural Abrente dánselles clases de cestería a 13 persoas. Na Asociación de Veciños San Salvador de Louredo hai un curso de baile tradicional no que están inscritos 13 veciños. Na Asociación Cultural e Social de Herville impárteselles cestería a 13 persoas, encaixe de bolillos a 10 persoas e danza oriental a 14 persoas. A Asociación Veciñal e Cultural de Celado ten un curso de arte floral no que participan 10 alumnos. A Asociación Chan do Bosque ten clases de canto popular para 18 persoas. Na Asociación de Veciños San Rafael impártense clases de Pilates a 16 alumnos. No curso de arte floral do Círculo Cultural Santa Eulalia participan un total de 17 veciños. O curso do Centro Recreativo e Cultural de Torroso é de reciclaxe de obxectos esquecidos no desván e conta con 11 alumnos. A Asociación Recreativa Cultural de Guizán dá clases de arte floral a 17 persoas. E, por último, a Asociación de Veciños de Petelos conta con dous cursos; un de pandeireta e canto popular con 12 participantes e outro de relaxación e control do estrés con 13 inscritos.

 Este programa está dirixido a tódolos veciños e veciñas maiores de 14 anos e, segundo a edil Julia Loureiro, “os seus obxectivos son fomentar a vida sociocultural e comunitaria, facilitar a posibilidade de ocupar o tempo de lecer con actividades formativas nun medio próximo, promover a participación social, o traballo en equipo e a creatividade nos distintos campos da actuación social; conseguir unha mellora persoal dos participantes a través da aprendizaxe e, sobre todo, dar resposta á gran demanda por parte das asociacións municipais”.

O Secretario Xeral da Agrupación Local do PSdG-PSOE de Salceda de Caselas e Concelleiro de Medio Ambiente e Desenvolvemento Sostible, Enrique Cabaleiro González, resultou elexido como novo membro da recén creada Executiva Provincial do partido en Pontevedra,  no Congreso celebrado o pasado sábado 3 de Outubro.Enrique Cabaleiro que ocupará a Secretaría de Formación dentro da citada Executiva, despois de agradecer a todolos militantes o apoio recibido tanto él coma os seus compañeiros, feleicitouse polo desenvolvemento do cónclave que segundo as súas verbas reforzará a cohesión e a fortaleza do partido a nivel provincial. 

Segundo Cabaleiro dende a súa nova responsabilidade traballará duro para axudar a organización a voltar a ser o referente político na Provincia, así como a mellorar as estructuras internas do partido, para acercalo as Agrupacións e a militancia e que estas sintan o respaldo que tanto están a demandar.

:: O Premio de Xornalismo Nano Cambeiro  foi instituído polo Instituto de Estudos Miñoranos e foi concecido, noutras edicións, a persoeiros da relevancia de Francisco Fernández del Riego ou Xosé  Luís Méndez Ferrín ::

Na reunión ordinaria do pasado 22 de setembro a Xunta de Goberno do Instituto de Estudos Miñoranos acordou por unanimidade conceder, nesta sétima edición, o premio ao suplemento mensual’A Peneira do Val Miñor’ do xornal ‘A Peneira’ tanto polo seu esforzo na difusión e análise da realidade miñorana realizado ao longo destes dous últimos anos, como por incardinarse na iniciativa xornalista do xornal’O Miñor’ que impulsou Nano Cambeiro, unha das mellores mostras de prensa local que houbo no país. Agora o esforzo da empresa editora de ‘A Peneira’ ven a retomar e a continuar o labor que Nano Cambeiro iniciara.

Así mesmo a Xunta de Goberno do IEM transmitiu os seus parabéns ao fundador e director da ‘Peneira’, Guillermo Rodríguez, tanto pola iniciativa premiada como pola conmemoración dos 25 aniversario do periódico quincenal que, en palabras de Méndez Ferrín, quen recibiu o primeiro premio Nano Cambeiro é: “O periódico sobre territorios históricos de Turonio, como son O Condado, O Val do Louro ou Louriña, O Val Miñor, O baixo Miño, e extende o tentáculo dunhas páxinas en portugués á rexión minhota”

O premio, sen dotación económica, consiste nunha peza de bronce obra do escultor e membro do Instituto de Estudos Miñoranos FERNANDO CASÁS, que se funde para entregar en cada convocatoria. A obra escultórica será entregada ao premiado nun acto público a realizar nos meses vindeiros.

Nas edicións anteriores o premio recaeu en Xosé Luís Méndez Ferrín, Francisco Fernández del Riego, David Reinero González, na web www.valminor.info, dirixida por Pedro Telmo Rodríguez Castro, na web www.Salvemosmonteferro.org, realizada polos irmáns Xosé e Anxo Reigosa Solleiro e no conxunto de relatos ‘O Cruceiro de San Campio’ dos que é autor Antonio Valverde.

A Xunta de Goberno do IEM acordou tamén convocar o Oitavo Premio de Xornalismo “Nano Cambeiro” para artigos publicados ao longo do ano 2009.
 

O Alcalde de Salceda de Caselas, Marcos Besada asinou o contrato para a Redacción do Plan municipal de prevención e defensa contra os incendios forestais que vai ser cofinanciado polo propio Concello e a Consellería de Medio Rural mediante un convenio de colaboración.

O orzamento para os traballos de elaboración deste plan ascende a 8.000 €, dos que a Consellería, a través da Dirección Xeral de Promoción do Emprego vai aportar 4.000 € facéndose cargo o Concello de Salceda de Caselas da diferencia. A empresa contratada para a redacción deste plan é Ideara S.L., que conta cunha ampla experiencia neste sector e que xa comezou os traballos de campo para levalo a cabo. O prazo para ser aprobado remata o 15 de novembro.

Unha vez dado este paso terá que ser integrado do Plan de Emerxencias Municipal que tamén está pendente dos informes favorables da Dirección Xeral de Protección Civil para ser aprobado definitivamente O Plan de prevención e defensa contra os incendios forestais é un documento obrigatorio e fundamental para analizar, previr e defenderse dos incendios forestais ademais de coordinar os distintos operativos de extinción, seguridade e emerxencias que se poden plantexar ante situacións deste tipo.

 Nel establécense distintos apartados, como poden ser os antecedentes, os obxectivos, o ámbito territorial, a análise da situación actual e actuacións previstas, os riscos de incendios, os medios municipais, a regulación de aproveitamento e usos, a análise económico-financieira das actuacións e o control do plan. Por outra banda tamén conta con un anexo onde se relacionan os traballos prioritarios de limpeza de zonas forestais en coordinación co Distrito Forestal de Zona.

Marcos Besada, Alcalde de Salceda, valorou como un obxectivo de goberno a posta ó día nestes trámites administrativos e de coordinación que o anterior goberno tiña esquecidos e que servirán para coordinar non só ós distintos corpos de prevención, extinción, seguridade e emerxencias, senón tamén a traballadores e poboación en xeral ante situacións de risco e que garantan unha loita eficaz contra os incendios forestais ademais da mellora da seguridade dos máis de 8.000 veciños que ten o Concello. “Este é un paso máis na teima deste goberno de preservar o medio natural, intentando evitar no posible as situacións tan desastrosas, como son os incendios forestais”.

 :: Axudar a que os pais dos escolares mosenses poidan conciliar as súas vidas familiar e laborar é a finalidade das dúas medidas adoitadas pola concellería de Educación, que se atopan enmarcadas dentro do Plan Concilia ::

 O Concello de Mos pon en marcha o Plan Concilia, que engloba unha importante subvención para o servizo de comedor escolar nos centros públicos e a instauración do Plan Madruga. Onte pola mañá asinouse no Concello de Mos un convenio coa Agrupación de ANPAS dos centros públicos do municipio para subvencionar o servizo de comedor escolar durante o curso 2009-2010.

O convenio foi asinado entre Nidia Arévalo, alcaldesa do Concello de Mos, e Alfonso Parada, Presidente da Agrupación das Asociacións de Nais e Pais de Alumnos/as dos centros públicos, coa presencia da concelleira de Educación, Julia Loureiro. A finalidade do convenio asinado é a regulación do outorgamento dunha axuda económica por menú servido nos comedores escolares dos colexios públicos de 1,5 euros, o que supón o 40% do custe do menú diario.

O importe total da subvención coa que o Concello dotará á Agrupación de ANPAS ascende a 22.000 euros que se repartirán durante o presente curso escolar entre cada ANPA con carácter mensual. Segundo declarou onte a edil de Educación mosense, Julia Loureiro, tras a sinatura do convenio, “esta axuda abarata moito o prezo diario do menú e suporá un importante aforro tanto para os pais dos nenos que quedan a comer no comedor escolar tódolos días, coma para os que o fan de vez en cando”.

Loureiro explicou tamén que “tanto o Plan Madruga coma as becas para o comedor son medidas adoitadas para conciliar a vida familiar e laboral dos pais de escolares ademais de para axudalos económicamente nestes momentos de crise”. A concelleira asegura que “esta subvención supón tamén un importante incremento do orzamento municipal destinado a comedores escolares, que pasou de 10.000 euros o ano pasado a 22.000 euros para o curso presente que representan máis do doble da cifra previa”. Ademais Julia Loureiro lembrou que “no 2009 o Concello de Mos xa lles concedeou a subvención total do comedor a 15 dos 20 alumnos que o solicitaron” e asegurou que “seguiráselles subvencionando completamente este servizo ós nenos e nenas cuias familias se atopen nunha situación económica precaria que lles imposibilite o pago do prezo do menú”.

Plan Madruga

O Plan Madruga é a segunda liña de actuación do Plan Concilia. Está funcionando xa no Colexio Pena de Francia e dende a concellería de Educación prevese que o Concello o subvencione neste colexio e se instaure tamén nos demais centros do municipio. Consiste na apertura dos CEIP públicos locais dende as sete e media da mañá para que os pais que traballan poidan deixar ós seus fillos no colexio a primeira hora. Os nenos almorzan no centro, onde os cuidadores organizan xogos de entretemento e actividades educativas relacionadas cos hábitos saudables que se deben de realizar antes, durante e despois do almorzo.

O acto de presentación contou coa presenza da concelleira de Medio Ambiente, Miriam Martínez Troncoso; e con persoal técnico responsable do programa O Concello do Porriño organiza este programa en colaboración coa Asociación Ecolóxica en Defensa de Galiza (ADEGA)

 O Concello do Porriño informa, a través da súa concellaría de Medio Ambiente, dirixida por Miriam Martínez Troncoso, da posta en marcha no Porriño da segunda edición do programa Compostaxe Caseira. A intención do programa Compostaxe Caseira, é a de mellorar o aproveitamento da materia orgánica xerada cos residuos domésticos (horta, cociña, etc). Consiste na entrega ás persoas participantes dun composteiro que se deberá situar nunha horta, xardín ou garaxe para comezar o proceso de compostaxe.

O persoal de ADEGA visitará os distintos fogares por tres veces ao longo dos sete meses de duración de Compostaxe Caseira, para asesorar e supervisar todo o proceso. As persoas interesadas en participar no programa, deben cumprimentar un documento de inscrición que se pode recoller na Casa do Concello e no Centro Cultural Municipal. É necesario estar empadroado no Porriño, e presentar o recibo do lixo para participar no programa. O prazo de inscrición remata o vindeiro 6 de novembro.

As prazas son limitadas, pois o número de composteiros é de 72. As persoas participantes deberán comprometerse a desenvolver o programa durante os sete meses de duración. As persoas anotadas no programa recibirán supervisión no proceso de elaboración de compost. Durante o desenvolvemento do programa, que durará entre sete e oito meses, as persoas participantes recibirán tres visitas do persoal técnico, a primeira para instalar os composteiros, a segunda para solucionar as dúbidas que poideran xurdir, e a terceira para realizarlles unha enquisa que serva para valorar e mellorar o programa.

A concellaría de Medio Ambiente, unha vez rematado o prazo de inscrición, ten previsto organizar unha charla co persoal técnico de ADEGA para explicar ás persoas inscritas o desenvolvemento do programa. “Con este programa pretendemos rachar cos hábitos actuais e recuperar unha práctica tradicional sustentábel como é a compostaxe caseira. Esta práctica con materia orgánica, permite eliminar o 50% do noso lixo, e axudar a separar mellor os distintos tipos de residuos, así como crear un fertilizante de moi boa calidade tanto para uso agrícola como para plantas e xardíns”, afirmou a concelleira de Medio Ambiente

A presentación desta XVI edición da Festa dos Callos do Porriño tivo lugar na mañá de hoxe na Praza do Arquitecto Antonio Palacios, contando coa presenza do Alcalde do Porriño, Raúl Francés; do concelleiro de Festexos do Concello Do Porriño, Marcos Rodríguez Novás; do conselleiro delegado da empresa Frigolouro, Javier Briones; do Alcalde do viciño concello de Salceda de Caselas, Marcos Besada, e da súa concelleira de Cultura, Teresa Pérez, que veñen de celebrar tamén a súa Festa dos Callos; e do pregoeiro da festa, Joaquin Diz “Cuquín”.

 O Porriño servirá unhas 15.000 racións de callos entre os días 3 e 4 de Outubro, que serán preparadas polo grupo Coren. A festa celebrarase na Praza de San Sebastián da vila porriñesa. O prezo das racións mantense respecto ao ano pasado, catro euros a ración de callos para levar, e seis euros a ración para degustar no recinto da festa, incluindo os callos, pan, viño, e o prato e a cunca conmemorativos desta edición. O sábado día 3, a partires das 23:30 horas, haberá degustación de callos para os maiores e nenos.

A degustación infantil é unha iniciativa xa celebrada anos pasados, para fomentar o consumo deste típico prato da nosa gastronomía entre os máis novos e novas. Cada neno ou nena que participe recibirá un agasallo. Amenizarán a degustación os Festicultores Troupe (www.festicultores.com), cos seus pasarrúas con ritmos balcánicos e festa rachada que tanto gustaron o pasado sábado, cando actuaron polas rúas do Porriño co gallo do día grande das Festas do Cristo. O domingo día 4 terá lugar a festa propiamente dita, desde primeiras horas da mañá.

O pregón, que terá lugar ás 12:00 horas, correrá a cargo do porriñés Joaquín Diz “Cuquín”. A mañán estará amenizada polo grupo de música da Asociación Cultural Os Zoqueiros do Porriño. A Festa dos Callos supón o remate das Festas do Cristo 2009, as festas patronais do Porriño. Durante un mes, a vila do Louro gozou dunha programación de actividades variada e para todos os públicos: música, teatro, animación de rúa, deporte, obradoiros medioambientais, sendeirismo…que toca ao seu fin con esta tradicional festa gastronómica.

A empresa adxudicataria, Pérez Portela S.L. comezou as obras de acondicionamento e ampliación da estrada que une os barrios de Cerquido e Regueiro na parroquia de Budiño incluídas no Fondo Estatal de Inversión Local polo Concello de Salceda de Caselas. Este proxecto conta cun orzamento de 70.000 € que serán destinados ó ensanche da citada estrada. Concretamente dentro deste orzamento prevense desbroces, movemento de terras, contención de terras, tubarias, etc.

A pavimentación da zona ensanchada está contemplada no PPC da Deputación Provincial contando cun orzamento de 30.000 €. As obras afectan a máis de 30 propietarios que voluntariamente cederon parte dos seus terreos para que a estrada quede cun ancho de entre 7 e 8 metros. As obras inclúen un muro de contención de 120 metros, o desprazamento dun xa existente de 40 metros e ademais retranqueouse o muro da Escola Unitaria de Budiño.

Por outra banda contemplase realizar catro rampas de acceso a fincas, 260 metros de canalización que melloraran a recollida de pluviais, os accesos as leiras e o regadío dos campos, o desprazamento de liñas eléctricas, de alumeado público e telefónicas. Aproveitarase tamén para a limpeza de cunetas e instalación de sumidoiros. O Concelleiro de Vías e Obras, Fortunato Álvarez salienta o complicado destas obras xa que é un número de parcelas afectadas cunha serie de problemas “históricos” pendentes de solucionar.

“Estamos en permanente contacto cos veciños e veciñas para que non xerar problemas e solucionar os que hai, tanto de accesos, regadíos, servidumes de paso e calquera outro que se poida producir” Marcos Besada, alcalde de Salceda, agradece ós propietarios das numerosas parcelas afectadas a cesión dos terreos precisos para esta obra e que se poida levar a cabo este proxecto, que considera importante para esta zona, á mais industrializada do concello, xa que vertebra o territorio e comunica unha parroquia aillada historicamente. “Por outro lado os veciños e veciñas da zona vanse ver favorecidos ó aumentar de valor as súas parcelas ó ter unha mellor vía de acceso.”