Marcos Besada: ‘O noso gran premio foi que a xente visualizara a nosa candidatura como forza útil e maioritaria’

                                      O BNG acadou uns resultados históricos en Salceda de Caselas. Marcos Besada, o candidato nacionalista á alcaldía, é consciente deste feito e do cambio que significa para un municipio que estivo, desde a chegada da democracia, gobernado pola mesma persoa. Fala con tranquilidade destes intensos últimos días en que as eleccións municipais centraron a súa vida.  Non ten ningún reparo en afirmar que o vindeiro 16 de xuño haberá un novo goberno no que estarán BNG e PSOE.

Antón Fernández Escuredo 

-Que valoración faría dos resultados?
Para o BNG absolutamente satisfactorios. Conseguimos tres obxectivos fundamentais. O primeiro foi convencer a veciños e veciñas de Salceda de que o cambio era posible, que perderan o medo a ese cambio e ao BNG e ao nacionalismo mediante unha campaña masiva con moita expectación, seria e divulgativa. Conservamos o mellor do BNG desde hai moitos anos e engadimos apoios moi significativos de persoas con ampla experiencia. Por iso o 27 de maio todo ese esforzo de anos deu o resultado da caida do réxime de 31 anos de Chicho. Os veciños e os sectores produtivos de Salceda déronse conta de que Chicho era un problema, unha persoa anclada no pasado que non se adaptou ao cambio de goberno na Xunta con respecto a outros alcaldes do PP. Mesmo non tivo os apoios tradicionais que ata traballaron para que houbera cambio. O noso gran premio foi que a xente visualizara a nosa candidatura como forza útil e maioritaria.
A nivel nacional tamén rompimos co tópico do tope electoral do BNG. Con traballo e seriedade podes chegar a vencer a unha persoa como Chicho.
 
                                                     
 

-Como van os contactos co PSdeG-PSOE?
Sabemos que a xente apostou polo cambio. Neste sentido o voto indicou que BNG é a forza maioritaria e polo tanto a escollida para liderar ese cambio. Por último os resultados sinalaron que había outra forza que apostaba polo cambio, o PSdeG-PSOE que podería participar. A asamblea do BNG interpretou que debemos facer un esforzo para confeccionar un goberno de coalición como xa existe na Xunta, sempre e cando o PsdeG-PSOE tivera claro o mandato dos veciños. Tivemos xa dous encontros, un o 1 e outro o 6 de xuño onde estivemos negociando. Coido que en próximos días chegara o acordo. No tocante ás faladurías destes días na comarca e na vila coido que foron consecuencia da situación novedosa e de comentarios intencionados da dereita “chichista”. Non me cabe a menor dúbida de que haberá un goberno do BNG e o PSOE.

-Despois das eleccións cambiou o trato dalgúns veciños co BNG?

O cambio xa pasou antes das eleccións. Días antes das eleccións había certa euforia por parte dos veciños, mesmo no trato persoal. Constatamos ese achegamento ata en persoas próximas a Chicho e ao PP. Os datos din que centos de persoas que votaron por el agora votaron polo BNG. Nas parroquias houbo ese cambio e notamos a participación da xente que nos contaba os seus problemas. Salceda é un concello moi pequeno onde nos coñecemos todos.
 

-Durante a campaña houbo apoio de cargos institucionais nacionalistas da Xunta. Supoño que houbo algunha chamada de felicitación despois destes resultados…
Si, tivemos moito apoio. Na precampaña e na campaña demostramos que Salceda sería importante no cambio. Por aquí pasaron directores xerais, moitos compañeiros e o Vicepresidente do goberno galego, Anxo Quintana. Notouse máis porque, por exemplo, a Chicho non lle veu ninguén excepto o presidente da Deputación. Igual é porque xa o tiñan “amortizado”. Despois, o propio día das eleccións todos me felicitaron.

-Pódese dicir que Salceda pode ser un exemplo para os nacionalistas?
Si, é un exemplo para o BNG, para o nacionalismo e para todos aqueles que apostan polo cambio de mentalidade, de cultura política e democrática. Demostramos que o nacionalismo non ten topes. Lembro dun estudo feito hai anos que dicia que o votante do PP se tiña que cambiar o seu voto sería para pasarse ao BNG por proximidade. Coido que, facendo unha reflexión máis ampla, o PP saiu perxudicado da actuación do seu partido a nivel estatal. A dereita galega non é a mesma que a estatal.

-Cal sería a primeira actuación a realizar no novo goberno?
O primeiro sería o modelo social e urbanístico. Urxe un novo. Un Plan Xeral consensuado con todo o mundo, que non só defina a construcción e os núcleos de poboación na vila senón tamén os equipamentos. Un modelo que respecte o medio ambiente e á sociedade. É fundamental que o concello dispoña de chan público para o máis urxente como o centro de saúde e un novo colexio de primaria.
Despois que os veciños sexan copartícipes do cambio. Isto visualizarase o propio día da investidura e cun diálogo permanente, implicándo ás entidades para que non sexan só expectadores. A menos que sexamos moi burros o cambio pode ser por moitos anos. O listón está baixo e se contamos coa xente e respectamos as súas ideas Salceda ten un futuro na Área Metropolitana esperanzador e pode ser un exemplo para toda a comarca e para todo o país.